Обновување на способностите
Денешната вежба го негираше мојот досегашен постулат - дека јас добро слушам. Нешто во што бев убеден дека сум многу добар. Слушањето, како разбирање на тоа што некој друг го кажува, можеби го претставува најголемиот проблем во мојот брак. Нешто што исклучително добро сум го правел во мојот професионален живот, но очајно лошо во мојот приватен живот. Сум бил апсолутно несвесен за тоа. Веројатно тоа потекнува од поставеноста на успехот во животот. Многу порано имам професионално успеано многу повеќе од мојата сопруга. Тоа го има наполнето моето его до таа мера што многу често се случувало да одбивам да ја слушам –
“Што имам јас тебе да те слушам. Види кој сум јас а која си ти.“
Тоа доведувало до ситуации кои не сум можел да ги објаснам на самиот себе. Прво, бидејќи претходно не сум слушал и второ бидејќи кога некој ти кажува нешто и гледа дека не слушаш ќе престане да ти кажува и други работи. Сега знам дека таа од професијата треба да ја пренесам и во приватноста. Да го намалам сопственото его и да слушнам што другите имаат да кажат. Грешката што ја направив со мојата сопруга нема да ја повторам со мојот син. Само со разбирање вистински ќе можам да му помогнам. Не можам да кажам дека сум среќен што го осознав ова за самиот себе, но од друга страна сум пресреќен што знам како можам да го подобрам многу важниот дел од мојот живот и да му помогнам на оној кому му е најпотребна мојата помош – мојот син.
